AKF-nin baş katibindən cavab | Karateçilərimiz İrəvanda çıxış edəcəklər? - Baku TV

Noyabrın 15-də Gürcüstanın paytaxtı Tbilisidə karate üzrə “WKF Open” turniri keçiriləcək.

Azərbaycan millisi sözügedən yarışda 30 idmançı, iki məşqçi və iki hakimdən ibarət heyətlə təmsil olunacaq.

Yarışa hazırlıq çərçivəsində Azərbaycan Karate Federasiyasının baş katibi Qabil Sayadov gələn ilin fevralında Ermənistanda keçiriləcək Avropa çempionatında Azərbaycan karateçilərinin mümkün iştirakı ilə bağlı sualları cavablandırıb.

“Hazırda bu yarışa gedən idmançılarımızın bir neçəsi yığma komandanın üzvləridir. Gələn il fevral ayında İrəvanda yeniyetmələr və gənclər arasında Avropa çempionatı keçiriləcək. Yığma komandamızın da orada iştirakı nəzərdə tutulur.

Təbii ki, bu həm də siyasi məsələdir. Bunun üçün xüsusi göstəriş və icazə almalıyıq. Artıq bu yarışa hazırlığa başlamışıq. Rəhbərlik necə qərar verərsə, biz də o şəkildə davam edəcəyik”, – deyə o bildirib.