Avropa çempionatında qalib müəyyənləşəcək

Bu gün – iyulun 14-ü futbol üzrə sayca 17-ci Avropa çempionatının qalibi müəyyənləşəcək.

Finalda yarışın 3 qat qalibi olan İspaniya yığması İngiltərə millisi ilə üz-üzə gələcək.

Berlinin “Olimpiyaştadion” arenasında keçiriləcək qarşılaşma Bakı vaxtı ilə saat 23-də start götürəcək. Oyunun baş hakimi isə fransalı Fransua Leteksye olacaq.

Həlledici görüş ərəfəsində “qırmızı furiya”da bir sıra itkilər var. Belə ki, zədəli Pedri və Ayoze Perez matçı buraxırlar. Xesus Navasın meydana çıxması isə sual altındadır. İspaniyalılardan fərqli olaraq britaniyalılar görüşə tam heyətlə hazırlaşırlar.

Maraq üçün deyək ki, bu komandalar sonuncu dəfə 2018-ci ildə üz-üzə gəliblər. Millətlər Liqası çərçivəsində Sevilya şəhərində keçirilən qarşılaşma İngiltərə millisinin 3-2 hesablı qələbəsi ilə yekunlaşıb.

Xatırladaq ki, İspaniya komandası daha əvvəl 4 dəfə qitə çempionatlarında final oynayıb. 1984-cü ildə Fransa futbolçularına uduzan pireneylilər 1964, 2008 və 2012-ci illərdə fəxri mükafatı qazanıblar. İngiltərə yığması isə yalnız 1 dəfə – 2021-ci ildə həlledici matçda iştirak etsə də, İtaliyaya uduzaraq 2-ci yeri tutub.