Avropa Liqası | "Qarabağ" - FCSB matçı

“Qarabağ” klubu UEFA Avropa liqasında növbəti matçına çıxıb.

“Köhlən atlar” Liqa mərhələsinin 7-ci turu çərçivəsində Rumıniya kollektivi FCSB ilə üz-üzə gəlib.

Tofiq Bəhramov adına Respublika Stadionunda keçirilən qarşılaşmada hesabı Ağdam klubu açıb. Artıq 1-ci dəqiqədə Leandro Andrade qonaqların qapısına yol tapmağı bacarıb. Lakin 6 dəqiqə sonra rumıniyalılar hesabı bərabərləşdiriblər. Adrian Sut hədəfi dəqiq nişan alıb.

41-ci dəqiqədə Ağdam təmsilçisi hesabda irəli çıxıb. Qonaqların heyətində Dava Coyskim avtoqol müəllifi olub. İlk hissəyə əlavə olunan dəqiqələrdə FCSB-nin heyətindən David Mikelesku bərabərlik qolunu vurub: 2-2. Lakin ikinci yarıya sürətli başlayan Rumıniya kollektivi 3-cü dəfə Ağdam klubunun qapısına yol tapıb. Adrian Sut dublunu rəsmiləşdirib.

“Qarabağ” son dəqiqələrə qədər məğlubiyyətdən xilas olmağa çalışsa da, bu, mümkün olmayıb.

Qeyd edək ki, bu nəticədən sonra “köhlən atlar” hazırda liqa mərhələsinin yarış cədvəlində 3 xalla 33-cü pillədə qərarlaşıb. FCSB 14 xalla 6-cı yerdədir.