Avropa Liqası: Sevilya-Roma matçı

UEFA Avropa liqasında final qarşılaşması keçirilib. Budapeştin “Puşkaş Arena” stadionundakı matçda “Sevilya” və “Roma” klubları üz-üzə gəliblər.

2 qolun qeydə alındığı oyunda hesabı “canavarlar” açıb. Paulo Dibala İtaliya təmsilçisini irəli çıxarıb. İlk hissə “Roma”nın minimal üstünlüyü ilə başa çatıb. 55-ci dəqiqədə hesab bərabərləşib. Canluka Mançini avtoqol müəllifi olub:1-1. Əsas vaxt bu hesabla yekunlaşıb. Əlavə 30 dəqiqədə də tərəflər fərqlənə bilməyib.

Qalibin adına penaltilər seriyasında aydınlıq gəlib. Burada isə İspaniya kollektivi daha dəqiq olub. Əndəlüs klubundan Okampos, Lamela, Rakitiç və Qonsalo Montiel 11 metrlik zərbəni dəqiq yerinə yetirib. “Roma”dan isə ancaq Brayan Kristante qapını dəqiq nişan alıb.

Beləliklə, penaltilər seriyasında 4-1 hesablı qələbə qazanan “Sevilya” UEFA kuboku turniri də nəzərə alınmaqla tarixində 7-ci dəfə fəxri mükafatın sahibi olub. Bu baxımdan rekordçu olan “Sevilya”nın ən yaxın izləyiciləri isə hərəyə 3 dəfə kuboka yiyələnən “İnter”, “Liverpul”, “Yuventus” və “Atletiko”dur.