Avropa liqasında 1/4 finalın ilk oyunları yekunlaşıb

UEFA Avropa liqasında 1/4 finalın ilk oyunları keçirilib.

Gecənin ən gözlənilməz nəticəsi İngiltərədə qeydə alınıb.

“Enfild”də “Atalanta”nı qəbul edən “Liverpul” 0-3 hesabı ilə uduzub. 1-ci hissəni Canluka Skamakkanın topu ilə öndə tamamlayan İtaliya klubu fasilədən sonra daha 2 qol vurub. Dubl edən Skamakka ilə yanaşı, Mario Paşaliçin zərbəsi dəqiq olub.

1/8 final mərhələsində “Qarabağ”dan güclü olan “Bayer” 1/4 finalın ilk görüşündə inamlı qələbə qazanıb. “Vest Hem”lə qarşılaşan leverkuzenlilər rəqibin müqavimətini ancaq oyunun sonlarında qırıblar.

Yonas Hofmann və Viktor Bonifeysin qolları Almaniya komandasına 2-0 hesablı qalibiyyət gətirib.

Daha bir maraqlı matçda İtaliya təmsilçiləri “Milan” və “Roma” üz-üzə gəliblər. “San-Siro” arenasında keçirilən görüşün taleyini 1 top həll edib. Canluka Mançinin qolu “calorossi”yə minimal hesablı qələbə qazandırıb.

Qeyd edək ki, Avropa liqasında 1/4 final mərhələsinin cavab oyunları aprelin 18-də keçiriləcək.