Avropa liqasında 1/8 finalın matçları keçirilib

UEFA Avropa liqasında 1/8 final mərhələsinin ilk görüşləri keçirilib.

1/16 finalda “Barselona”ya qalib gələn “Mançester Yunayted” bu dəfə İspaniyanın digər təmsilçisi “Betis”lə üz-üzə gəlib. “Old Trafford” arenasındakı oyunda “qırmızı şeytanlar” inamlı qələbə qazanıb. Meydan sahiblərinin heyətində Reşford, Antoni, Brunu Fernandeş və Veqorstun qollarına qonaqlar yalnız Ayoze Perezin topu ilə cavab verib. “Mançester Yunayted” - “Betis”: 4-1.

Daha bir qarşılaşmada “Fənərbağça” komandası “Sevilya”nın qonağı olub. İlk hissəsi qolsuz başa çatan matç Əndəlüs klubunun qələbəsi ilə yekunlaşıb. “Roxiblankos”un heyətində Joan Jordan və Lamela hədəfi dəqiq nişan alıb. “Sevilya” - “Fənərbağça”: 2-0.

Mərhələnin digər oyununda İngiltərə çempionatının lideri “Arsenal” Portuqaliyada “Sportinq”lə üz-üzə gəlib. “Topçular” Salibanın qolu sayəsində hesabı açsalar da, Lissabon klubu ardıcıl 2 top vurmağı bacarıb. Bununla belə, yerli komanda sərfəli nəticəni qoruya bilməyib. Xidemasa Moritanın avtoqolundan sonra tarazlıq bərpa olunub: 2-2. Görüş məhz bu hesabla yekunlaşıb.