Avropa Liqasında yarımfinalın ilk matçları keçirilib

UEFA Avropa liqasında yarımfinal mərhələsinin ilk matçları keçirilib.

Yarışın favoriti “Bayer” “Olimpiko” arenasında “Roma”nın qonağı olub. 1-ci hissə Virtsin qolu sayəsində leverkuzenlilərin minimal üstünlüyü ilə yekunlaşıb.

2-ci yarıda “canavarlar”ın hücumları nəticə verməyib. Əvəzində 73-cü dəqiqədə Robert Andrix 2-ci topu meydan sahiblərinin qapısına göndərib. Qarşılaşma Almaniya təmsilçisinin 2-0 hesablı üstünlüyü ilə yekunlaşıb.

“Marsel” və “Atalanta” arasında görüşdə də 2 qol vurulub. “Velodrom” arenasında baş tutan oyunda hesabı qonaqlar açıblar. Canluka Skamakka fərqlənib. Bir qədər sonra isə Şansel Mbemba tarazlığı bərpa edib. “Marsel” – “Atalanta”: 1-1.

Qeyd edək ki, Avropa liqasında yarımfinal mərhələsinin cavab qarşılaşmaları mayın 9-da keçiriləcək. Turnirin final matçı isə İrlandiyanın paytaxtı Dublində təşkil olunacaq. “Aviva Stedium”un ev sahibliyi edəcəyi görüş mayın 22-si baş tutacaq.