Avropa Liqasında yarımfinalın ilk matçları keçirilib

UEFA Avropa liqasında yarımfinalın ilk oyunları keçirilib.

“Atletik”in qonağı olan “Mançester Yunayted” inamlı qələbə qazanıb.

“Qırmızı Şeytanlar” Bilbaoda təşkil olunan matçda 3-0 hesabı ilə güclü olub. “San Mames” stadionundakı görüşdə bütün qollar ilk yarıda vurulub. Dubl edən Brunu Fernandeşlə yanaşı, Kazemironun zərbəsi dəqiq olub.

Gecənin digər qarşılaşmasında da İngiltərə klubu qalib gəlib. Norveç təmsilçisi “Budyo Qlimt”i qəbul edən “Tottenhem” ilk yarını Brennan Conson və Ceyms Meddisonun qolları ilə irəlidə tamamlayıb: 2-0.

Fasilədən sonra tərəflər hərəyə bir dəfə fərqləniblər. “Mahmızlar”dan Dominik Solanke, qonaqlardan isə Ulrik Saltnes qapını dəqiq nişan alıb. “Tottenhem” ‒ “Budyo Qlimt”: 3-1.

Qeyd edək ki, Avropa liqasında yarımfinalın cavab matçları mayın 8-i baş tutacaq. Yarışın finalı isə mayın 21-i “Atletik”in ev oyunlarını keçirdiyi və Bilbao şəhərində yerləşən “San Mames” stadionunda təşkil olunacaq.