Azərbaycan çempionatı : “Sabah” - “Qarabağ” matçı

Azərbaycan Premyer Liqasında 30-cu turun mərkəzi matçı 2-ci pillədə qərarlaşan “Sabah” və lider “Qarabağ" arasında olub.

Görüşün ilk hissəsində tərəflərin qol vurmaq imkanları olsa da, hesab açılmayıb. 2-ci yarı daha maraqlı alınıb. 72-ci dəqiqədə Coy Lens Mikels meydan sahiblərini irəli çıxarıb: 1-0. Çox keçmədən fərq 2-yə yüksəlib. C.L.Mikels özünün və komandasının 2-ci qolunu vurub.

Bundan sonra irəli atılan Ağdam təmsilçisi bir neçə təhlükəli vəziyyət yaratsa da, ancaq 1 topun əvəzini çıxa bilib. 86-cı dəqiqədə Riçard Almeydanın zərbəsi dəqiq olub. Qalan vaxtda müdafiədə diqqətli oynayan “Sabah” sərfəli nəticəni qoruyaraq 2-1 hesablı qələbə qazanıb.

Qalibiyyət sayəsində xallarının sayını 68-ə çatdıran paytaxt klubu əvvəlki kimi 2-ci yerdədir. Komanda ölkə çempionatında 536 gündən sonra məğlub olan “Qarabağ”dan 9 xal geri qalır.

Qeyd edək ki, “köhlən atlar” növbəti turda “Zirə” ilə qarşılaşacaq. “Sabah” isə “Turan Tovuz”un qonağı olacaq.