Azərbaycanlı idmançı 37 saniyəyə erməniyə qalib gəldi

Quba rayonun Aşağı Atuc kəndindən olan MMA döyüşçüsü Zəfər Abdürrəhmanov növbəti peşəkar görüşünü Tbilisidə keçirib.

“GFC” liqasında mübarizəyə qoşulan idmançımızın rəqibi erməni Narek Qalstyan olub. Qarşısına məqsəd qoyan Zəfər saniyələr içində rəqibini məğlub edib.

Parlaq qələbə qazanaraq Vətənə qayıdan idmançımız təəssüratlarını Baku TV ilə bölüşüb. Zəfər Abdürrəhman bildirib ki, düşmən üzərində qələbə qazanmaq çox qürurvericidir: “Bu uğurlarımın içində ən böyüyüdür”.

16 ildən çoxdur idmanın müxtəlif növləri ilə məşğul olan 22 yaşlı Zəfər bu günə qədər dünyanın bir çox ölkəsində keçirilən yarışlarda adını birincilər sırasına yazdırmağı bacarıb. Hazırda isə o, daha bir beynəlxalq yarışa hazırlaşır. İdmançının sözlərinə görə, o, Özbəkistanda keçiriləcək “Dünyanın güclüləri” yarışına qatılacaq.

Qeyd edək ki, MMA turnirlərində 3-cü qələbəsini əldə edən Zəfər Abdürrəhmanov daha əvvəl “IFC” liqasında mübarizə aparıb. O, karyerası ərzində cəmi bir dəfə məğlub olub.