“Barselona”nın baş məşqçisi klubun gənc futbolçusunun performansından narazıdır

İspaniyanın “Barselona” klubunun vingeri Ansu Fatinin klubu tərk edəcəyi ehtimalları getdikcə yüksəlir. İspaniya mətbuatında onun mövsüm başa çatdıqdan sonra klubdan gedəcəyi xəbərləri yer almaqdadır.

Bildirilir ki, komandanın baş məşqçisi Hans-Diter Flik artıq 22 yaşlı futbolçudan yaxa qurtarmaq niyyətindədir.

Flik bu barədə fikirlərini klub rəhbərliyinə də çatdırıb. Klubun idarə heyəti də onunla vidalaşmaq istəyir.

Üstəlik, La Liqanın son qarşılaşmasında “Valyadolid”ə qarşı oyunda futbolçu almaniyalı çalışdırıcının əsəblərini tarıma çəkib. Onun performansının Hans-Diter Fliki çox məyus etdiyi qeyd olunur. Çox güman ki, bu mövsüm başa çatdıqdan sonra Ansu Fati yenidən klubdan göndəriləcək. Bu dəfə isə artıq icarə əsasında deyil.

Qeyd edək ki, Ansu Fati “Barselona” klubunun yetirməsidir. Futbolçu gözləntiləri doğrultmadığı üçün 2023-2024-cü illər mövsümünü icarə əsasında İngiltərənin “Brayton” klubunda keçirib. 2024-2025-ci illər mövsümündə Ansu Fati klub səviyyəsində 11 oyun keçirib. Futbolçu nə qol, nə də məhsuldar ötürmə ilə yadda qalıb. “Transfermarkt” portalı futbolçunun dəyərini 5 milyon avro olaraq qiymətləndirir.