Beynəlxalq Çövkən Federasiyasının təsis edilməsi ilə bağlı Baş Assambleya işə başlayıb

Bakıda Beynəlxalq Çövkən Federasiyasının təsis edilməsi ilə əlaqədar I Baş Assambleya öz işinə başlayıb.

Binə Atçılıq Mərkəzində təşkil olunan tədbirdə bütün qitələri əhatə edən 19 ölkədən 29 nümayəndə iştirak edib. Bununla əlaqədar keçirilən açılış mərasimində Azərbaycan Respublikası Atçılıq Federasiyasının prezidenti, Dövlət Sərhəd Xidmətinin rəisi, general-polkovnik Elçin Quliyev, gənclər və idman naziri Fərid Qayıbov, Milli Olimpiya Komitəsinin vitse-prezidenti Çingiz Hüseynzadə və xarici qonaqlar iştirak ediblər.

Tədbirdə Qarabağ atlarının iştirakı ilə milli rəqs kompozisiyaları nümayiş olunub. Daha sonra Baş Assambleyanın işinə start verilib.

Tədbirdə çıxış edən Elçin Quliyev çövkənin Azərbaycanda yaranmasının bir çox mənbələrdə əksini tapdığını bildirib. Beynəlxalq Çövkən Federasiyasının təsis iclasının böyük önəm kəsb etdiyini deyən Elçin Quliyev bunun çövkənin inkişafına töhvə verəcəyini vurğulayıb.

Qeyd edək ki, fevralın 2-dək işinə davam edəcək Beynəlxalq Çövkən Federasiyasının I Baş Assambleyası çərçivəsində qurumun əsasnaməsi təsdiq olunmaqla yanaşı, prezident və vitse-prezidentlər postuna seçkilər baş tutacaq.