Bu gün Avropa Liqasında qalib məlum olacaq

Bu gün UEFA Avropa liqasında 2023/2024-cü illər mövsümünün qalibi müəyyənləşəcək.

Turnirin finalında 51 oyundur uduzmayan Almaniya çempionu “Bayer Leverkuzen” “Atalanta” ilə üz-üzə gələcək.

İrlandiyanın paytaxtı Dublində yerləşən “Aviva Stedium”da keçiriləcək matç Bakı vaxtı ilə saat 23:00-da başlayacaq. Görüşün baş hakimi isə rumıniyalı İştvan Kovaç olacaq.

Vacib oyun ərəfəsində İtaliya təmsilçisində bəzi itkilər var. Marten De Ron, Sead Kolaşinats və Emil Holm zədə səbəbindən “Atalanta”ya kömək edə bilməyəcəklər. “Bayer” isə qarşılaşmaya tam heyətlə hazırlaşır.

Qeyd edək ki, “Bayer” əvvəlki adı ilə UEFA kuboku adlandırılan bu yarışda 1988-ci ildə qələbə qazanıb. Həmin vaxt finalda “Espanyol”la üz-üzə gələn leverkuzenlilər rəqibini penaltilər seriyasında məğlub etmişdilər. “Atalanta” isə bu gün güclü olacağı təqdirdə tarixində ilk dəfə avrokubokda qələbəyə sevinəcək.