Çempionlar liqası: “Arsenal” “Real Madrid”i, “Bavariya” “İnter”i qəbul edib

UEFA Çempionlar liqasında 1/4 finalın oyunlarına start verilib.

Yarışın son qalibi “Real Madrid” mərhələnin ilk matçında “Arsenal”ın qonağı olub.

“Emireyts” arenasında keçirilən görüşün 1-ci hissəsi qolsuz yekunlaşıb. Qarşılaşmada hesabı 58-ci dəqiqədə Deklan Rays açıb.

Bundan sonra da hücumları davam etdirən “topçular” 70-ci dəqiqədə fərqi artırıb. Yenə Deklan Rays diqqət mərkəzinə düşüb.

Təzyiqi azaltmayan meydan sahibləri 75-ci dəqiqədə 3-cü qolu vurublar. Mikel Merino oyunda son nöqtəni qoyub. “Arsenal” – “Real Madrid”: 3-0.

Digər görüşdə “Bavariya” “Alyans Arena”da “İnter”i qəbul edib. Münxendəki matçda ilk yarı Lautaro Martinesin qolu sayəsində “neradzurri”nin üstünlüyü ilə bitib.

Fasilədən sonra təzyiqi artıran “rekordmayster”in bərabərlik cəhdləri 85-ci dəqiqədə nəticə verib. Tomas Müller tarazlığı bərpa edib. Lakin İtaliya təmsilçisi qələbə qolunu vurmağa müvəffəq olub. Davide Frattezinin dəqiq zərbəsi “İnter”ə qalibiyyət gətirib.

Qeyd edək ki, həm “Arsenal” – “Real Madrid”, həm də “Bavariya” – “İnter” cütündə 1/4 finalın cavab oyunu aprelin 16-da keçiriləcək.