Çempionlar Liqası: "İnter" - "Barselona" görüşündə 7 qol vuruldu

UEFA Çempionlar Liqasının yarımfinal mərhələsinin cavab qarşılaşmalarına start verilib.

İlk finalçının adına Milanda aydınlıq gəlib. “İnter” öz meydanında “Barselona”nı qəbul edib.

Şimon Marçiniakın idarə etdiyi görüş 120 dəqiqədən çox davam edib. Qarşılaşmada hesabı meydan sahibləri açıb. Lautaro martinez 21-ci dəqiqədə “İnter”i irəli çıxardıb. Daha sonra Milan təmsilçisinin heyətində Hakan Çalhanoğlu penalti zərbəsini dəqiq yerinə yetirib.

İkinci hissəyə İspaniya təmsilçisi inamlı start verib. Erik Qarsiya və Dani Olmi müvafiq olaraq 54 və 60-cı dəqiqələrdə tarazlığı bərpa edə bilib. 87-ci dəqiqədə isə Rafinya Dias “Barselona”ya bir top fərqi ilə üstünlük qazandırıb.

Oyunun əsas vaxtına əlavə olunmuş 3-cü dəqiqədə Françesko Açerbi həm oyunda, həm də iki qarşılaşmanın nəticəsinə bərabərlik gətirib: 3-3. Beləliklə, komandalar arasında ilk qarşılaşma da bu hesabla başa çatdığından oyun əlavə vaxtlara qədər uzanıb.

“İnter”in yarımmüdafiəçisi Davide Frattezi 99-cu dəqiqədə oyunda yekun hesabı müəyyən edib.

Beləliklə, qarşılaşmanı 4-3 hesabı ilə qazanan “İnter” bu mövsüm UEFA Çempionlar Liqasının finalına yüksələn ilk komanda olub.

Kubok uğrunda qarşılaşmada “Neradzuri”nin rəqibi bu gecə keçiriləcək PSJ və “Arsenal” matçından sonra müəyyən olunacaq.