Çempionlar liqasında 1/4 finala yekun vurulub

UEFA Çempionlar liqasında yarımfinalın bütün iştirakçıları müəyyənləşib.

1/4 finalın ilk matçında yarışın son qalibi “Real”ı 3-0 hesabı ilə məğlub edən “Arsenal” cavab oyununda üstünlüyü əldən verməyib.

“Santyaqo Bernabeu” arenasındakı görüşdə hesabı 65-ci dəqiqədə Bukayo Saka açıb. Az sonra Vinisius Junior bərabərlik qolunu vursa da, “kral klubu”nun bundan artığına gücü çatmayıb. Əvəzində son dəqiqələrdə Qabriel Martinelli 2-ci topu “los blankos”un qapısına göndərib.

Beləliklə, iki matçın yekununda 5-1 hesabı ilə güclü “Arsenal” yarımfinalda PSJ-yə rəqib olub. Bu komandalar arasında ilk qarşılaşma aprelin 29-u Londonda, cavab görüşü isə mayın 6-sı Parisdə keçiriləcək.

Yarımfinalda “Barselona” ilə üz-üzə gələcək komandanın adına da aydınlıq gəlib. Münxendə keçirilən ilk oyunda “Bavariya”ya 2-1 hesabı ilə qalib gələn “İnter” öz meydanında sülhə razılaşıb. “Cuzeppe Meatsa” arenasındakı matçda hesabı 52-ci dəqiqədə Harri Keyn açsa da, Lautaro Martinez və Bencamen Pavarın qolları ilə “neradzurri” irəli çıxıb: 2-1.

76-cı dəqiqədə Erik Dayer “rekordmayster”in 2-ci topunu vurub. Lakin “Bavariya” bundan artığını bacara bilməyib. İki oyunun yekununda 4-3 hesabı ilə qalib gələn “İnter” yarımfinala adlayıb.

İtaliya təmsilçisinin “Barselona”ya qarşı ilk matçı aprelin 29-u səfərdə, cavab görüşü isə mayın 6-da Milanda olacaq.