Çempionlar liqasında 1/4 finalın ilk matçları yekunlaşıb

UEFA Çempionlar liqasında 1/4 finalın ilk oyunlarına yekun vurulub.

Turnirin favoritlərindən “Barselona” komandası “Borussiya Dortmund”la matçda inamlı qələbə qazanıb.

“Blauqrana”nın meydanında keçirilən görüşdə hesabı 25-ci dəqiqədə Rafinya açıb.

2-ci yarıda da təzyiqi davam etdirən kataloniyalılar 48 və 66-cı dəqiqələrdə Robert Levandovskinin topları ilə fərqi artırıblar.

Qarşılaşmada son nöqtəni “Barsa”nın gənc ulduzu Lamin Yamal qoyub. “Barselona” ‒ “Borussiya Dortmund”: 4-0.

“Pari Sen-Jermen” və “Aston Villa” arasında matçda da 4 top qeydə alınıb. “Park de Prensdə”ki oyunda birmingemlilər Morqan Rocersin qolu ilə önə çıxsalar da, fasiləyədək Dezire Due bərabərliyi təmin edib: 1-1.

49-cu dəqiqədə parislilər önə keçiblər. Xviça Kvaratsxeliya PSJ-ni irəli çıxarıb. Əsas vaxta artırılan dəqiqələrdə isə Nunu Mendeş 3-cü topu İngiltərə təmsilçisinin qapısına göndərib.

Qarşılaşma Fransa nəhənginin 3-1 hesablı qələbəsi ilə yekunlaşıb.

Qeyd edək ki, Çempionlar liqasında 1/4 finalın cavab matçları aprelin 15-i və 16-da təşkil olunacaq.