Çempionlar liqasında 1/4 finalın püşkatması olub

UEFA Çempionlar liqasında 1/4 final, yarımfinal və final mərhələlərinin püşkü atılıb.

İsveçrənin Nyon şəhərində keçirilən tədbirdə 1/4 finalçılar bu cür müəyyənləşib: “Arsenal” – “Bavariya”, “Atletiko” – “Borussiya Dortmund”, “Real Madrid” – “Mançester Siti”, “Pari Sen-Jermen” – “Barselona”.

Püşkatmaya əsasən, “Atletiko” və “Borussiya” arasında mübarizədə güclü olan tərəf yarımfinalda “Pari Sen-Jermen” – “Barselona” cütünün qalibi ilə qarşılaşacaq. “Arsenal” və “Bavariya” arasında oyunlarda qalib komanda isə yarımfinalda “Real Madrid” və ya “Mançester Siti” ilə üz-üzə gələcək.

Finala gəldikdə, “Atletiko”, “Borussiya”, “Pari Sen-Jermen” və “Barselona” komandalarından biri həlledici görüşdə nominal ev sahibi, “Arsenal”, “Bavariya”, “Real Madrid” və ya “Mançester Siti” isə qonaq kollektiv olacaq.

Qeyd edək ki, 1/4 final mərhələsinin ilk oyunları aprelin 9-u və 10-da, cavab matçları isə aprelin 16-sı və 17-də keçiriləcək. Yarımfinalın ilk görüşləri aprelin 30-na və mayın 1-nə, cavab qarşılaşmaları isə mayın 7-nə və 8-nə nəzərdə tutulub. Final oyunu isə iyunun 1-də Londonun “Uembli” stadionunda təşkil olunacaq.