Çempionlar liqasında 6-cı turun oyunları keçirilir

UEFA Çempionlar liqasının Liqa mərhələsində 6-cı turun görüşləri keçirilir.

Maraqlı oyunlardan biri İtaliyanın Berqamo şəhərində “Atalanta” və “Real Madrid” arasında olub. 5 qolun vurulduğu qarşılaşma “kral klubu”nun 3-2 hesablı qələbəsi ilə başa çatıb.

Son çempionun heyətində Kilian Mbappe, Vinisius və Cud Bellingem fərqləniblər. “Atalanta”dan isə Şarl de Ketelare və Ademola Lukman qapını dəqiq nişan alıb.

İtaliyanın digər təmsilçisi, son vaxtlar əla formada olan “İnter” 6-cı turda “Bayer”lə bacarmayıb. Leverkuzendə keçirilən matçda meydan sahibləri Nordi Mukielenin 90-cı dəqiqədə vurduğu qolla minimal qalibiyyət əldə ediblər.

Məhsuldar görüşlərdən birində “Leypsiq” və “Aston Villa” üz-üzə gəlib. Birmingemlilərin 3-2 hesablı qələbəsi ilə bitən qarşılaşmadan sonra “Leypsiq” növbəti mərhələyə adlamaq imkanlarını itirib. Almaniya klubu geridə qalan 5 turda da bütün matçlarda məğlub olub.

“Şaxtyor”un qonağı olan Almaniyanın digər komandası “Bavariya” 5-1 hesabı ilə güclü olub. “Rekordmayster”in qollarını dubl edən Maykl Olise ilə yanaşı, Konrad Laymer, Tomas Müller və Camal Musiala vurublar.

“Pari Sen-Jermen” də azarkeşlərini sevindirməyi bacarıb. Avstriyada “Zaltsburq”la qarşılaşan Fransa nəhəngi Qonsalu Ramuş, Nunu Mendeş və Dezire Duenin topları ilə 3-0 hesablı qələbə qazanıb. Turnirin sensasiyalarından “Brest” klubu bu dəfə Niderland çempionu PSV-yə qalib gəlib. Fransa klubu 3 xalı Jülyen Le Kardinalın yeganə qolu ilə aktivinə yazdırıb.

Eyni hesab yarışın favoritlərindən “Liverpul”un matçında da qeydə alınıb. İspaniya səfərində “Jirona” ilə üz-üzə gələn “qırmızılar” Məhəmməd Salahın 11 metrlik cərimə zərbəsindən vurduğu qolla qələbə qazanıb.