Çempionlar liqasında I tura yekun vurulub

UEFA Çempionlar liqasında Liqa mərhələsinin I turuna yekun vurulub. Son oyun günündə maraqlı matçlardan biri Monakoda olub.

Eyniadlı komandanın qonağı olan “Barselona” artıq 11-ci dəqiqədə azlıqda qalıb. Erik Qarsiya birbaşa qırmızı vərəqə ilə meydandan uzaqlaşdırılıb. Bir qədər sonra Manes Akliuş Knyazlıq təmsilçisini hesabda irəli çıxarsa da, 28-ci dəqiqədə Lamin Yamal tarazlığı bərpa edib. Bununla belə, 71-ci dəqiqədə fərqlənən Corc İlenixena “Monako”ya 2-1 hesablı qələbəni gətirib.

Eyni hesab İspaniyanın digər kollektivi “Atletiko”nun qarşılaşmasında da qeydə alınıb. Ancaq “blauqrana”dan fərqli olaraq Madrid klubu turu 3 xalla başa vurub. “Leypsiq”i qəbul edən “Atletiko” Benyamin Şeşkonun qolundan sonra hesabda geriyə düşsə də, Antuan Qrizman və Xose Mariya Ximenesin dəqiq zərbələri ilə matçdan qalib ayrılıb.

Ötən mövsüm Bundesliqa çempionu olmaqla yanaşı, Avropa liqasının finalına yüksələn “Bayer” də azarkeşlərini sevindirib. Niderlandın “Feyenoord” komandası ilə üz-üzə gələn Xabi Alonsonun yetirmələri 4 cavabsız topla güclü olublar. Rotterdamdakı “De Kip” arenasında keçirilən oyunda qonaqlardan dubl edən Floryan Virts, eləcə də Aleks Qrimaldo fərqlənib. Daha bir epizodda rəqibin qapıçısı Timon Vellenroyter avtoqol müəllifi olub.

I turun digər görüşlərinə gəldikdə, “Benfika” Serbiya səfərində “Srvena Zvezda”nı 2-1 hesabı ilə məğlub edib. Fransa təmsilçisi “Brest” eyni hesabla Avstriyanın “Şturm Qrats” klubuna qalib gəlib. “Atalanta” və “Arsenal” arasında İtaliyada keçirilən qarşılaşma isə qolsuz sülhlə bitib.

Bu nəticələrdən sonra Liqa mərhələsinin yarış cədvəlinə “Bavariya” başçılıq edir. “Dinamo Zaqreb”i 9-2 hesabı ilə məğlub edən “rekordmayster” top fərqinə görə digər komandaları qabaqlayır.