Çempionlar Liqasında ilk turun oyunları keçirilib

UEFA Çempionlar liqasında 2023/2024-cü illər mövsümünün qrup mərhələsinə start verilib.

Yarışın son qalibi G qrupunda yer alan “Mançester Siti” ilk turda “Etihad Stedium”da “Srvena Zvezda”nı qəbul edib.

İlk hissə Bukarinin qolu sayəsində qonaqların minimal üstünlüyü ilə yekunlaşsa da, 2-ci yarıda “şəhərlilər” Alvaresin dublu və Rodrinin topu ilə dönüş edərək 3-1 hesablı qələbə qazanıblar.

Fransa çempionu “Pari Sen-Jermen” də turu 3 xalla tamamlayıb. “Park de Prens”də Dortmund “Borussiya”sı ilə qarşılaşan parislilər Mbappe və Hakiminin qolları ilə 2-0 hesabı ilə güclü olublar.

“Latsio” və “Atletiko” Madrid arasında oyun da maraqlı alınıb. Pireneylilər Barriosun qolu ilə fasiləyə öndə yollansalar da, qələbə hesabını qoruya bilməyiblər. Son saniyələrdə “Latsio”nun qapıçısı Provedel komandasını məğlubiyyətdən xilas edib.

Diqqət mərkəzində olan görüşlərdən birində İtaliyanın digər təmsilçisi “Milan” klubu “Nyukasl”ı qəbul edib. Gərgin mübarizə ilə əlamətdar olan matçda qapılar qarşısında təhlükəli vəziyyətlər yaransa da, 90 dəqiqə ərzində tərəflər fərqlənə bilməyiblər.