CIES dünyanın 100 ən dəyərli futbolçularının siyahısını hazırlayıb

Beynəlxalq İdman Araşdırmaları Mərkəzi dünyanın ən bahalı futbolçularının adlarını açıqlayıb.

Qurumun tərtib etdiyi və 100 oyunçunun yer aldığı siyahıya “Real Madrid”in ulduzu Cud Bellingem başçılıq edir. İngiltərəli yarımmüdafiəçinin dəyəri 251,4 milyon avrodur. 2-ci pillədə “Mançester Siti”nin hücumçusu Erlinq Holand qərarlaşıb. Onun dəyəri təqribən 221,5 milyon avrodur.

İlk üçlüyü “kral klubu”nun braziliyalı vingeri, “The Best” mükafatının son qalibi Vinisius Junior qapayır. 4-cü və 5-ci yerləri isə müvafiq olaraq “Barselona”nın istedadlı üzvü Lamin Yamal və “Real”ın fransalı forvardı Kilian Mbappe tutublar.

Ümumən ilk onluqda “los blankos”un 4 futbolçusuna yer verilib. Daha əvvəl adları çəkilən oyunçularla yanaşı, Rodriqo da ən dəyərli futbolçular arasında göstərilib.

İlk onluğun digər pillələrində “Arsenal”dan Bukayo Saka, “Bayer Leverkuzen”dən Floryan Virts, “Çelsi”dən Koul Palmer və “Mançester Siti”dən Fil Foden mövqe tutublar.

Maraqlıdır ki, 100 futbolçunun olduğu siyahıda ən çox təmsil olunan məhz Madrid “Real”ıdır. İspaniya nəhənginin oyunçularından Federiko Valverde, Eduardo Kamavinqa, Orelyen Çuameni, Endrik, Arda Gülər və Braim Dias da dünyanın ən dəyərli futbolçuları arasında göstəriliblər.