“Dirçəliş Kuboku” xeyriyyə turnirinin finalı olub

Qarabağ Dirçəliş Fondunun təşəbbüsü və təşkilatçılığı ilə keçirilən “Dirçəliş Kuboku” xeyriyyə futbol turnirinin qalibi müəyyənləşib.

Həlledici oyunda İnnovasiya və Rəqəmsal İnkişaf Agentliyi və SOCAR-ın komandaları üz-üzə gəliblər.

Gərgin mübarizə ilə əlamətdar olan görüşdə SOCAR kollektivi 1-0 hesablı qələbə qazanıb.

Final matçından sonra Qarabağ Dirçəliş Fondunun İdarə Heyətinin sədri Rəhman Hacıyev, AFFA-nın icraçı vitse-prezidenti Sərxan Hacıyev və AFFA-nın baş katibi Cahangir Fərəcullayevin iştirakı ilə mükafatlandırılma mərasimi keçirilib. Yarışın qalibi olan SOCAR komandası qızıl medallar və kubok, müxtəlif mövqelər üzrə ən yaxşı futbolçular isə xüsusi mükafatlara layiq görülüb.

Qeyd edək ki, xeyriyyə futbol turnirində dövlət qurumlarının və müxtəlif şirkətlərin ümumən 40 komandası yarışıb. Sponsorlar və iştirakçılar tərəfindən Qarabağ Dirçəliş Fonduna ianə edilən 141 000 manat vəsait Füzuli şəhərində salınacaq Füzuli Mərkəzi Parkının ərazisində idman meydançalarının tikintisinə yönəldiləcək.