Eduard Məmmədov Əbu-Dabidə keçirilən dünya çempionatında iki qızıl medal qazandı

Azərbaycan Respublikası Daxili İşlər Nazirliyinin İdman Cəmiyyətinin İdman-təlim şöbəsinin rəisi, polis polkovnik-leytenantı, Azərbaycan Kikboksinq Federasiyasının vitse-prezidenti, dəfələrlə dünya və Avropa çempionu Eduard Məmmədov 21-30 noyabr tarixlərində Birləşmiş Ərəb Əmirliklərinin Əbu-Dabi şəhərində keçirilən Kikboksinqin WAKO versiyası üzrə dünya çempionatında "Master Class" kateqoriyasında 63 kq çəki dərəcəsində 2 versiya üzrə vuruşaraq 2 qızıl medal qazanıb.

"Light Contact" növündə Böyük Britaniya, Portuqaliya, İtaliya və "Kick Light" növündə İsveç, Kanada və İtaliya idmançılarına qalib gələrək ümumən WAKO üzrə 10-cu dəfə dünya çempionu olub.

Çempion olan idmançı bu qələbəsini şəhidlərimizə həsr etdiyini bildirib. O, şəhidlərə Allahdan rəhmət, qazilərə can sağlığı diləyib.

Başda Suraxanı Rayon İcra Hakimiyyətinin başçısı, Azərbaycan Kikboksinq Federasiyasının Fəxri Prezidenti Adil Əliyev və Azərbaycan Kikboksinq Federasiyasının Prezidenti Orxan Əliyevə, həmçinin Azərbaycan Respublikası Gənclər və İdman Nazirliyinə təşəkkürlərini bildirib.

Qeyd edək ki, Eduard Məmmədov hər üslubda 3 döyüş olmaqla, 2 gün ərzində 6 qarşılaşma keçirib.