Eduard Məmmədov və tələbələri dünya çempionatında tarixi uğura imza atıblar

Azərbaycan Respublikası Daxili İşlər Nazirliyinin İdman Cəmiyyətinin İdman-təlim şöbəsinin rəisi, polis polkovnik-leytenantı Eduard Məmmədov, onun tələbələri, eləcə də Azərbaycan Kikboksinq Federasiyası WAKO versiyası üzrə dünya çempionatını parlaq nəticə ilə başa vurub.

Onlar Portuqaliyanın Albufeira şəhərində keçirilən yarışı 6-sı qızıl, 1-i gümüş və 6-sı bürünc olmaqla ümumən 13 medalla tamamlayıblar.

63 kq çəki dərəcəsində yer alan Eduard Məmmədov “Kick light” və “Light contact” versiyalarında bütün rəqiblərinə qalib gələrək 2 qızıl medal qazanıb.

Onun tələbələrindən, “Ağ canavar” ləqəbli Amin Quliyev də turnirdə qızıl medala yiyələnib. "Low kick" versiyasında 60 kq çəkidə çıxış edən Amin 18 yaşında böyüklər arasında dünya çempionu olub.

Eyni uğura "Low kick" versiyasında 54 kq çəkidə qüvvəsini sınayan Elvin Məmmədov da imza atıb. “Tayson” ləqəbli idmançı 17 yaşında böyüklər arasında dünya çempionu olub.

Eduard Məmmədovun daha bir tələbəsi Fərid Ağamoğlanov isə "Full Contact" versiyası üzrə 63,5 çəkidə bürünc medalın sahibi olub.

Eduard Məmmədov bu uğur münasibətilə Federasiyanın baş məşqçisi Elşən Abdulrəhmanova və məşqçi Telman Məhərrəmova, eləcə də vitse-prezident Ramal Aslanova təşəkkürünü bildirib.

Bundan başqa, Eduard Məmmədov Milli Məclis sədrinin müavini, Azərbaycan Kikboksinq Federasiyasının fəxri prezidenti Adil Əliyevə və Azərbaycan Kikboksinq Federasiyasının prezidenti Orxan Əliyevə də təşəkkür edib.

Bu uğur münasibətilə butün Azərbaycan xalqını təbrik edən Eduard Məmmədov qələbələrini şəhidlərimizə həsr edib.