Eşitmə məhdudiyyətli idmançı Coşqun Əliyev Deflimpiya Oyunlarında yaşadıqlarını bölüşdü - Baku TV

Eşitmə məhdudiyyətli idmançı Coşqun Əliyev Yaponiyada keçirilən Yay Deflimpiya Oyunlarında qazandığı təcrübə və yaşadıqları barədə Baku TV-yə danışıb.

İdmançı bildirib ki, Deflimpiya Oyunlarında iştirak onun üçün həm böyük sevinc, həm də əvəzolunmaz təcrübə olub.

“Oyunlarda iştirak edəndə çox sevinirdim. Müxtəlif idman növlərində mənim kimi eşitmə məhdudiyyətli bir çox idmançı iştirak edirdi. Bu mənim üçün böyük bir təcrübə idi. Buna görə də Azərbaycan Deflimpiya Komitəsinə təşəkkür edirəm”, – deyə Coşqun Əliyev vurğulayıb.

İdmançı ilk görüşündə koreyalı rəqiblə qarşılaşdığını və bu mərhələnin onun üçün olduqca çətin keçdiyini bildirib.

“İlk rəqibim fiziki cəhətdən çox güclü görünürdü. Özümü həqiqətən çətin vəziyyətdə hiss edirdim. Lakin onu məğlub etdikdən sonra içimdə böyük bir rahatlıq yarandı.

İkinci mərhələdə xorvatiyalı idmançı ilə qarşılaşdım və bu görüş mənim üçün daha asan keçdi. Üçüncü rəqibim isə niderlandlı idi, yaşca məndən böyük və fiziki cəhətdən daha güclü görünürdü. Onun qalib gəlmək şansı mənə nisbətən daha çox idi. Amma zamanımı və fəndlərimi düzgün istifadə edərək ona xal vermədim və qalib gəldim. Bu qələbə məni daha da sevindirdi.

Final görüşündə braziliyalı idmançı ilə qarşılaşdım. Onun beynəlxalq yarışlarda təcrübəsi və enerjisi daha yüksək idi. Texnikaya üstünlük verməyə çalışdım, amma o, müdafiəni demək olar ki, itirmirdi. Ani bir səhvim nəticəsində məğlub oldum və ikinci yerdə qərarlaşdım. Buna baxmayaraq, yenə də sevinirəm. Çünki bu yarışlarda yer tutmağı bacardım. Yarışdan əvvəl təlim-məşq toplanışlarında iştirak etməyimiz bu nəticəyə böyük təsir göstərdi”, – deyə C.Əliyev əlavə edib.

İdmançı qeyd edib ki, yarışlardan sonra ailəsi və yaxınları ilə sevincini bölüşüb və hazırda da mütəmadi olaraq məşqlərini davam etdirir.

Gələcək hədəflərindən danışan C.Əliyev bildirib ki, əsas məqsədi daha yüksək nəticələr əldə etməkdir: “Öncədən danışmaq istəmirəm, amma birinci yerə layiq olmaq üçün hər zaman çalışacağam”.