Eyni gündə iki məşhur məşqçi istefaya göndərilib

Martın 12-si məşhur məşqçilər Maurisio Sarri və Rafael Benitesin istefaya göndərilməsi ilə yadda qalıb.

Buna Sarrinin çalışdırdığı “Latsio” və Benitesin işlədiyi “Selta”nın son matçlardakı zəif çıxışı səbəb olub.

Belə ki, İtaliya klubu bütün yarışlarda son 6 oyunun cəmi 1-də qalib gəlib. Bundan başqa, “byankoselesti” Çempionlar liqasının 1/8 finalında “Bavariya”ya uduzaraq avrokubokla da vidalaşıb. “Selta”nın rəhbərliyi isə La liqanın 28-ci turunda “Real”a 0-4 hesabı ilə məğlubiyyətdən sonra Beniteslə vidalaşmağa qərar verib.

Son 9 matçın 6-da uduzan və cəmi 2 dəfə qələbə qazanan Viqo klubu hazırda çempionatda son pillələrdədir. La liqada qalmaq uğrunda mübarizə aparan kollektiv 18-ci yerdəki “Kadis”i cəmi 2 xal qabaqlayır.

Qeyd edək ki, Mauritsio Sarri 2021-ci ilin iyunundan “Latsio”da işləyirdi. Rafa Benites isə ötən ilin yayından “Selta”ya rəhbərlik edirdi.