“Fənərbağça” çempionluq yolunda ağır zərbə alıb

“Fənərbağça” klubu superliqada çempionluq mübarizəsində ağır zərbə alıb.

İstanbul təmsilçisi 33-cü turda “Sivasspor”la səfər matçında xal itirib. Sivas şəhərində keçirilən oyun 2-2 hesabı ilə bitib. Hərçənd ilk hissə Fredin qolu sayəsində qonaqların minimal üstünlüyü ilə yekunlaşıb.

57-ci dəqiqədə Fode Koyta tarazlığı bərpa etsə də, İrfan Can Kahvecinin qolu “Fənər”i yenidən irəli çıxarıb. Lakin baş məşqçi İsmayıl Kartalın futbolçuları qələbə hesabını qoruya bilməyiblər. Rey Manay “Sivasspor”u məğlubiyyətdən xilas edib.

Ardıcıl 7 qələbədən sonra xal itirən “Fənərbağça” hazırda 2-ci yerdədir. 86 xalı olan kollektiv lider “Qalatasaray”dan 4 xal geri qalır.

Qeyd edək ki, 34-cü turda “Fənər”i daha bir çətin sınaq gözləyir. Komanda aprelin 27-si keçiriləcək matçda doğma meydanda “Beşiktaş”la qarşılaşacaq.