Formula 1-də Böyük Britaniya Qran-prisinin qalibi bəlli oldu

Formula 1 üzrə dünya çempionatında mövsümün 10-cu yarışı keçirilib. Pilotlar bu dəfə Böyük Britaniya Qran-prisinin qalibini müəyyənləşdiriblər.

“Silverstoun” trasında baş tutan etapa poul mövqeyində “Red Bull” sürücüsü Maks Ferstappen başlayıb. Mərhələ ərzində üstünlüyünü qoruyan niderlandlı pilot yekunda finişə 1-ci çatıb. Maks ən yaxın izləyicisi, “Maklaren” üzvü Lando Norrisi 3,798 saniyə qabaqlayıb.

İlk 3-lüyü “Mersedes” pilotu Lyuis Hemilton qapayıb. Ardıcıl 6-cı, mövsümdə isə 8-ci qələbəsini qazanan Ferstappen ümumi sıralamada ilk pillədəki mövqeyini bir qədər də möhkəmləndirib. 255 xal toplayan Maks 2-ci yerdə olan Serxio Peresi 99 xal qabaqlayır.

Mühəndislər kuboku uğrunda mübarizədə də “Red Bull” liderdir. 411 xalı olan Avstriya komandası 2-ci pillədə qərarlaşan “Mersedes”dən 208 xal irəlidədir.

Qeyd edək ki, Formula 1 üzrə dünya çempionatının 11-ci yarışı Macarıstanda keçiriləcək. “Hunqarorinq” trasında baş tutacaq Qran-prinin qalibi iyulun 23-də müəyyənləşəcək.