Formula 1 üzrə Belçika Qran-prisinin qalibi məlum oldu

Formula 1 üzrə dünya çempionatında Belçika Qran-prisinin qalibi müəyyənləşib.

Spa-Frankorşam trasında təşkil olunan mövsümün 12-ci yarışına poul mövqeyində Şarl Lekler başlasa da, mərhələnin gedişində Maks Ferstappen liderliyi ələ keçirib. Sona qədər üstünlüyünü əldən verməyən “Red Bull” pilotu yekunda etapın qalibi olub.

Mövsümdə 10-cu dəfə finişə 1-ci çatan Maks ən yaxın izləyicisi, komanda yoldaşı Serxio Peresi 22,305 saniyə qabaqlayıb. İlk 3-lüyü “Ferrari” üzvü Şarl Lekler qapayıb. Ən sürətli dövrənin sahibi Lyuis Hemilton isə finiş xəttini 4-cü keçib.

Belçikada qələbə sayəsində ümumi sıralamada xallarının sayını 314-ə çatdıran Ferstappen 1-ci pillədəki mövqeyini bir qədər də möhkəmləndirib. Son 2 ilin dünya çempionu 2-ci yerdə olan Peresdən 125 xal öndədir.

Qeyd edək ki, Formula 1 üzrə yarışların növbəti mərhələsi Niderlandda təşkil olunacaq. Zandvort trasında baş tutacaq Qran-prinin qalibi avqustun 27-də müəyyənləşəcək.