Formula 1 üzrə Mayami Qran-prisinə yekun vuruldu
Formula 1 üzrə dünya çempionatında növbəti yarışın qalibi müəyyənləşib.
ABŞ-nin Mayami şəhərində keçirilən Qran-pri “Red Bull”un qələbəsi ilə əlamətdar olub. Mayami avtodromunda baş tutan mərhələnin sıralama turunda Serxio Peres 1-ci yeri tutsa da, əsas yarışda Maks Ferstappen qalib gəlib. Meksikalı sürücü finişə 2-ci, “Aston Martin”in üzvü Fernando Alonso isə 3-cü çatıb.
Mövsümdə 3-cü qələbəsini qazanan M.Ferstappen bu nəticədən sonra ümumi sıralamadakı liderliyini qoruyub. Son 2 ilin dünya çempionu olan Maks 119 xalla siyahıya başçılıq edir. 14 xal geri qalan Serxio Peres 2-ci, 75 xalı olan Alonso isə 3-cü yerdədir.
Mühəndislər kuboku uğrunda mübarizədə də “Red Bull” ilk pillədə qərarlaşıb. 224 xalı olan Avstriya kollektivi ən yaxın izləyicisi “Aston Martin”i 122 xal qabaqlayır.
Qeyd edək ki, Formula 1 üzrə dünya çempionatının növbəti etapı İtaliyada baş tutacaq. “İmola” avtodromunda keçiriləcək Qran-prinin əsas yarışı mayın 21-nə nəzərdə tutulub.
![icon](/images/loading.png)