Futbol dünyasının ən dəyərli 11-liyi açıqlanıb

Məşhur “transfermarkt” portalı öz versiyasına görə dünyanın ən dəyərli 11-liyini tərtib edib.

4-2-3-1 taktiki sxeminə əsasən hazırlanan rəmzi komandanın qapısını “Portu”nun portuqaliyalı qolkiperi Dioqu Koşta qoruyur.

Müdafiənin sol cinahında PSJ və Portuqaliya millisinin üzvü Nunu Mendeş, sağ cinahında isə “Liverpul”un ingiltərəli oyunçusu Trent Aleksander-Arnold yer tutub. Mərkəz müdafiəçiləri mövqeyində “Arsenal”dan Vilyam Saliba və “Mançester Siti”dən Ruben Diaş qərarlaşıb.

Yarımmüdafiədə də Premyer liqanın futbolçuları çoxluq təşkil edir. Komandanın dayaq yarımmüdafiəçiləri kimi “Mançester Siti”dən Rodri və “Arsenal”dan Deklan Raysa, sağ cinahda isə “topçular”ın digər üzvü Bukayo Sakaya yer verilib.

Digər iki mövqedə “Real”ın ulduzları Cud Bellingem və Vinisius Junioru görmək olar. Yeganə hücumçu isə PSJ-dən gedişi gündəmdə olan və dəyəri 180 milyon avro göstərilən Kilian Mbappedir.

Qeyd edək ki, sözügedən rəmzi 11-liyin ümumi dəyəri 1 milyard 200 milyon avrodan çoxdur.