Futbol klublarının yeni dünya reytinqi açıqlanıb

Azərbaycan çempionu “Qarabağ” klubların dünya reytinqində geriləyib.

Ağdam komandası Beynəlxalq Futbol Tarixi və Statistikaları Federasiyasının hazırladığı siyahıda 103-cü yerdədir.

147,75 xalı olan “köhlən atlar” əvvəlki reytinqlə müqayisədə 16 pillə geriləyib. Ümumən 501 komandanın olduğu siyahıda daha 2 təmsilçimiz yer alıb. “Zirə” 98,25 xalla 219-cu, 68,5 xalı olan və 61 pillə irəliləyən “Sabah” isə 353-cü yerdədir.

Qeyd edək ki, reytinqə əvvəlki kimi “Real Madrid” başçılıq edir. Çempionlar liqasının son qalibi ən yaxın izləyicisi Leverkuzen “Bayer”ini 103 xal qabaqlayır. İtaliyanın “Atalanta” komandası isə 3-cü pillədədir. İlk 10-luğun digər yerlərində İngiltərənin “Liverpul” və “Arsenal”, İspaniyanın “Barselona” və “Atletiko”, Almaniyanın “Bavariya”, Fransanın PSJ və Braziliyanın “Botafoqo” klubları mövqe tutublar.