Futbolumuzun əfsanəsi Tofiq Bəhramovun anadan olmasının 100-cü il dönümüdür

Yanvarın 29-u dünyaca məşhur azərbaycanlı futbol hakimi Tofiq Bəhramovun anadan olmasının 100-cü ildönümüdür.

1925-ci il yanvarın 29-da dünyaya göz açan Tofiq Bəhramov 1940-cı ildə futbolçu karyerasına start verib.

Bakının “Spartak” və “Neftçi” klublarında çıxış etdikdən sonra ayağından aldığı zədə nəticəsində fəaliyyətini ədalət təmsilçisi kimi davam etdirən Tofiq Bəhramov 1965-ci ildə beynəlxalq dərəcəli hakim adına yiyələnib.

O həm də keçmiş SSRİ tarixinə avrokubok matçını idarə edən ilk referi kimi düşüb. Belə ki, 1972-ci ildə İngiltərənin “Tottenhem” və “Vulverhempton” klubları arasında UEFA kubokunun ilk matçı azərbaycanlı referiyə həvalə olunmuşdu.

Onun adının bütün dünyada tanınmasına səbəb olan əsas hadisə isə heç şübhəsiz 1966-cı ildə İngiltərədə keçirilən mundialda baş verib. Əsas vaxtı 2-2 hesabı ilə bitən Almaniya və İngiltərə yığmaları arasında final görüşündə yan xətt hakimi olan Tofiq Bəhramov əlavə vaxtda Ceffri Hörstün zərbəsindən sonra yaranan mübahisəli epizodda topun qapı xəttini keçdiyini bəyan etmişdi. Həmin qarşılaşmanın yekununa əsasən 4-2 hesabı ilə qalib gələn İngiltərə seçməsi tarixində ilk dəfə dünya çempionu olmuşdu. Tofiq Bəhramov isə bu oyundan sonra “Qızıl fit” mükafatına layiq görülmüşdü.

Karyerasını bitirdikdən sonra AFFA-da hakimlərin sədri, daha sonra baş katib vəzifələrində çalışan Tofiq Bəhramovun 1993-cü il martın 26-da vəfat etməsindən sonra Bakıda yerləşən Respublika Stadionu onun şərəfinə adlandırılıb.