Hakimin döyülməsindən sonra Türkiyə futbolunda növbəti biabırçılıq

Futbol üzrə Türkiyə çempionatında növbəti xoşagəlməz hadisə baş verib. Superliqanın 17-ci turunda “İstanbulspor” və “Trabzonspor” arasında matç yarıda dayandırılıb.

Belə ki, görüşün 74-cü dəqiqəsində İstanbul klubunun prezidenti Ecmel Faik Sarıalioğlu meydanın kənarına gələrək, oyunçularına oradan çıxmaq barədə göstəriş verib. Futbolçular funksionerin qərarına təsir etməyə çalışıblar, hətta oyunçulardan biri Sarıalioğlunun qarşısında diz çöküb. Ancaq “İstanbulspor”un prezidenti qərarından dönməyib.

Qeyd edək ki, Ecmel Faik Sarıalioğlunu qəzəbləndirən hadisə oyunun 68-ci dəqiqəsində baş verib. Hesab 1-1 olarkən “İstanbulspor”un üzvü Florian Löşay hücumların birində “Trabzonspor”un cərimə meydançası yaxınlığında yerə yıxılıb. “İstanbulspor”un futbolçuları hakimdən penalti tələb etsələr də, referi görüşü saxlamayıb. Bu epizod həm “İstanbulspor”un futbolçuları, həm də klub rəhbərliyinin qəzəbinə səbəb olub. Bir qədər sonra “Trabzonspor”un 2-ci qolunu vurması isə “İstanbulspor”un prezidentinin səbr kasasını daşırıb. Qeyd edək ki, bu qarşılaşmanın yekunu ilə bağlı qərarı Türkiyə Futbol Federasiyası verəcək.