Hər şey bu qədər asan olmamalıdır | İdman ekspertindən Demiral açıqlaması

Bu qərarın doğru olmadığını düşünürəm. İlk olaraq xəbərdarlıq, yaxud şərti cəza tətbiq edilə bilərdi. Ən pis halda bir matç qadağası mümkün idi.

Bu sözləri idman eksperti Kənan Məstəliyev Türkiyə millisinin futbolçusu Merih Demiralın UEFA tərəfindən 2 oyunluq cəzalanmasına münasibət bildirərkən deyib.

“Niyyətdən çox şey asılıdır. Merih açıqlamasında da deyib ki, mən türkəm, türklüyümü bildirirəm. Bəli, qadağan olunmuş işarələr var, amma hələ bilmək olmaz, “Bozqurd” işarəsi ora aiddir, yoxsa yox? Suallar çoxdur.

UEFA-nın qərəz nümayiş etdirdiyini hesab edirəm. Bu qərarı qəbul edən komitənin sədri avstriyalı Tomas Partidir. Türkiyənin məhz Avstriyanı yendiyini və hadisənin məhz bu matçda baş verdiyini düşünsək, şübhə ilə yanaşmağa əsasımız var. Hər şey bu qədər asan olmamalıdır”, – K.Məstəliyev bildirib.

Qeyd edək ki, UEFA Avstriya ilə oyunda “Bozqurd” işarəsi göstərdiyinə görə Türkiyə yığmasının oyunçusu Melih Demirala iki oyunluq cəza verib.