Hərbçilər arasında dünya çempionatında 222 güləşçi mübarizə aparır

Bakıda hərbçilər arasında güləş üzrə 36-cı dünya çempionatına start götürüb.

Tədbirin əvvəlində hərbçilərin paradından sonra arenaya Azərbaycan Respublikasının Dövlət Bayrağı gətirilib və Dövlət Himnimiz səsləndirilib.

Açılış mərasiminin davamında gənclər və idman nazirinin müavini Mariana Vasileva və Beynəlxalq Hərbi İdman Şurasının Avropa üzrə vitse-prezidenti Dirk Şvede çıxış edərək yarış iştirakçılarını salamlayaraq onlara uğurlar arzulayıblar.

Daha sonra turnirdə mübarizəyə start verilib. Yarışın ilk günü idmançılarımız üçün uğurlu alınıb. Təmsilçilərimizdən üçqat dünya və dördqat Avropa çempionu Hacı Əliyevlə yanaşı, Əli Rəhimzadə, Turan Bayramov və İbrahim Yusubov qızıl medal qazanıblar.

Qeyd edək ki, dünya çempionatında 176-sı kişi və 46-sı qadın olmaqla, 18 ölkədən ümumilikdə 222 idmançı qüvvəsini sınayır.