İngiltərə Liqa Kuboku: “Tottenhem” - “Mançester Yunayted” görüşü

İngiltərə Liqa kubokunda 1/4 finalın ən gözlənilən matçı “Tottenhem” və “Mançester Yunayted” arasında olub.

Londonda keçirilən görüşdə 7 qol vurulub. İlk hissə Dominik Solankenin topu sayəsində “mahmızlar”ın minimal üstünlüyü ilə yekunlaşıb.

2-ci yarı daha maraqlı alınıb. Əvvəlcə 46-cı dəqiqədə Deyan Kuluşevski “qırmızı şeytanlar”ın qapısına yol tapıb. Çox keçmədən Solanke dubl edib: 3-0.

Bundan sonra fəallaşan mankunianlar 2 topun əvəzini çıxıblar. Yozua Zirkze ilə yanaşı, Amad Diallo fərqlənib.

88-ci dəqiqədə meydan sahibləri 4-cü qolu vurublar. Son Hön-Min künc nöqtəsindən topu birbaşa qapıya göndərib. Artırılan dəqiqələrdə Conni Evans qonaqları ümidləndirsə də, “Yunayted”in bundan artığına gücü çatmayıb.

4-3 hesablı qələbə qazanan “Tottenhem” yarımfinala vəsiqə əldə edib. Şimali London komandası bu raundda “Liverpul”la qarşılaşacaq. Mərhələnin ilk matçı gələn il yanvarın 8-i “Tottenhem Hotspur Stedium”da, cavab qarşılaşması isə fevralın 5-i “Enfild”də keçiriləcək.