İngiltərə Premyer Liqasında çempionun adına aydınlıq gəlib

“Liverpul” komandası 2024/2025-ci illər mövsümündə İngiltərə Premyer Liqasının qalibi olub.

“Qırmızılar” titulu 34-cü turda “Tottenhem”lə matçda təmin edib.

“Enfild” arenasında baş tutan qarşılaşmada hesabı qonaqlar açıblar. Dominik Solanke sabiq komandasını məyus edib. Lakin mersisaydlıların cavabı özünü gözlətməyib. 16-cı dəqiqədə Luis Dias, 24-cü dəqiqədə isə Aleksis Mak Alisterin qolları ilə “Liverpul” hesabda irəli çıxıb: 2-1.

Fasiləyə qədər fərq bir qədər də artıb. Kodi Qakponun zərbəsi dəqiq alınıb. 2-ci yarıda da hücumları davam etdirən meydan sahibləri 63-cü dəqiqədə “mahmızlar”ı 4-cü dəfə oyuna mərkəzdən başlamağa məcbur ediblər.

Çempionatın ən yaxşı bombardiri Məhəmməd Salah 28-ci qolunu vurub. Matçda son nöqtəni avtoqol müəllifi olan Destini Udoqi qoyub. “Liverpul” ‒ “Tottenhem”: 5-1.

Rəqibini darmadağın edən “qırmızılar” 5 illik fasilədən sonra Premyer Liqanın qalibi olub. 20-ci dəfə qızıl medallara yiyələnən mersisaydlılar həm də bu göstəriciyə görə rekordçu “Mançester Yunayted”lə bərabərləşib.