İngiltərə Premyer liqasında maraqlı oyunlar olub

Qeyri-sabit nəticələrlə diqqət çəkən “Mançester Yunayted” Premyer liqanın 34-cü turundan təxirə salınan matçda “Nyukasl”ı qəbul edib.

“Old Trafford”da keçirilən görüşdə ilk hissə 1-0 hesabı ilə yekunlaşıb. 31-ci dəqiqədə Kobi Maynu “sağsağanlar”ın qapısına yol tapıb. 2-ci yarının əvvəlində Entoni Qordon tarazlığı bərpa etsə də, çox keçmədən Amad Diallo mankunianları yenidən irəli çıxarıb.

Qalan vaxtda tərəflər hərəyə 1 dəfə fərqləniblər. “Yunayted”dən Rasmus Höylund, qonaqlardan isə Lyuis Holl qapını dəqiq nişan alıb. 3-2 hesablı qələbə qazanan Mançester təmsilçisi xallarının sayını 57-yə çatdıraraq “Nyukasl”la bərabərləşib. Komandalar 7-ci, 8-ci yerləri bölüşdürür.

Gecənin digər qarşılaşmasında “Brayton” klubu öz meydanında “Çelsi” ilə üz-üzə gəlib. “Ameks Stedium”dakı oyunda “zadəganlar” 2-1 hesabı ilə güclü olublar. London təmsilçisinin heyətində Koul Palmer və Kristofer Nkunkunun qollarına “qağayılar” Uelbekin yeganə topu ilə cavab verib. Ardıcıl 4-cü görüşdə qalib gələn “Çelsi” son tur ərəfəsində 6-cı yerdədir.