Kriştiano Ronaldo və Lionel Messi 21 ildən sonra ilk yaşadılar

Dünyaca məşhur “France Football” nəşri “Qızıl top” mükafatına namizəd olan futbolçuların adlarını açıqlayıb.

30 oyunçunun olduğu siyahıda 2003-cü ildən bəri ilk dəfə Kriştiano Ronaldo və Lionel Messiyə yer verilməyib.

2023/2024-cü illər mövsümünün yekununa əsasən təqdim olunacaq mükafata namizədlər arasında Cud Bellinhem, Kilian Mbappe, Vinisius Junior, Erlinq Holand, Lamin Yamal və Harri Keyn kimi ulduz futbolçular var.

“France Football” həm də ötən mövsümün ən yaxşı qapıçısına və gənc oyunçusuna təqdim olunacaq “Lev Yaşin” və “Raymon Kopa” mükafatlarına namizədlərin adlarını təqdim edib. Ən yaxşı qolkiperlər arasında Canluici Donnarumma, Andrey Lunin, Giorgi Mamardaşvili və Emiliano Martines kimi çərçivə qoruyucuları yer alıblar.

Gənc futbolçulardan isə Arda Gülər, Lamin Yamal, Alehandro Qarnaço və Kobbi Maynu “Kopa” mükafatını qazana bilərlər.

Qeyd edək ki, həm “Qızıl top”un sahibi, həm də digər nominasiyalarda qaliblərin adları oktyabrın 28-də keçiriləcək xüsusi tədbirdə açıqlanacaq.