Kriştiano Ronaldo və Neymara “Qızıl Top” şoku

Dünyaca məşhur “Frans Futbol” nəşri nüfuzlu “Qızıl top” mükafatına namizədlərin adlarını açıqlayıb.

Ümumilikdə 30 futbolçunun olduğu siyahıda UEFA tərəfindən ötən mövsümün ən yaxşısı seçilən Erlinq Holandla yanaşı, Lionel Messi, Kilian Mbappe, Məhəmməd Salah, Vinisius Junior, Robert Levandovski və Kevin de Brüyne kimi ulduzlar da yer alıb.

Bundan başqa, 2022-ci ildə “Qızıl topa” layiq görülən, bir müddət əvvəl Səudiyyə Ərəbistanının “Əl-İttihad” klubuna keçən Kərim Benzemanın da adı sözügedən siyahıya daxil edilib.

Maraqlı məqamlardan biri namizədlər arasında Kriştiano Ronaldo və Neymarın olmamasıdır. “Əl-Nəsr”in şərəfini qoruyan portuqaliyalı ulduz 19 ildən sonra ilk dəfə “Frans Futbol”un siyahısında yer almayıb. Bu yay “Əl-Hilal” komandasına qoşulan Neymar isə ötən mövsüm zəif çıxış etdiyi üçün namizədlər arasında deyil.

Qeyd edək ki, “Frans Futbol” nəşri ötən mövsümün yekunlarına dair daha 2 növ üzrə qalibləri açıqlayacaq. Ən yaxşı gənc futbolçuya Raymon Kopa, ən yaxşı qapıçıya isə Lev Yaşin mükafatı təqdim olunacaq.