Mauro İkardi "Qalatasaray"dan ayrıla bilər

Türkiyə nəhəngi “Qalatasaray” argentinalı ulduzu Mauro İkardini itirə bilər.

Bu barədə xarici mediada xəbərlər paylaşılır.

İddialara görə, 31 yaşlı forvard ölkəsinin “River Pleyt” komandasının maraq dairəsindədir. Bildirilib ki, argentinalılar uzun müddətdir Mauronu yaxından izləyirlər. Son xəbərlərə görə, tərəflər yanvar ayında mümkün keçidlə bağlı müzakirələr aparacaqlar.

Qeyd edək ki, karyerası ərzində “Sampdoria”, “İnter” və PSJ kimi məşhur klublarda forma geyinən Mauro İkardi 2022-ci ildən “Qalatasaray”da top qovur. Bu müddət ərzində 86 matçda meydana çıxan forvard 61 qol və 22 məhsuldar ötürmə müəllifi olub. “Cim-bom”la 2 dəfə Türkiyə çempionatını qazanan Mauro Super Kubokda da qalib gəlib.

Maraq üçün deyək ki, “Qalatasaray”la müqaviləsi 2026-cı ilə qədər olan ulduz futbolçunun məşhur “Transfermarkt” portalına əsasən dəyəri 15 milyon avrodur.