“Milan”ın əfsanəsini klubdan qovdular

A Seriyası nəhənglərindən “Milan” klubunun əfsanəsi Paolo Maldini istefaya göndərilib.

İtaliya təmsilçisinin sahibi Cerri Kardinalenin qərarına əsasən, 54 yaşlı Maldini texniki direktor vəzifəsindən azad edilib. Paolo ilə yanaşı, kollektivin idman direktoru Frederik Massaranın da müqaviləsinə xitam verilib.

İtaliya mətbuatının məlumatına əsasən, “Milan”ın sahibi C.Kardinale onların klubun planlarına uyğun gəlmədiyini əsas gətirərək menecerləri vəzifələrindən uzaqlaşdırıb.

Son xəbərlərə görə, C.Kardinale P.Maldini və F.Massaranın tanınmış futbolçuların dəvətinə əsaslanan transfer siyasətini dəstəklənmirdi. Xüsusilə 35 milyon avroya komandaya qoşulan belçikalı Şarl de Ketelarenin keçidi rəhbərlik tərəfindən uğursuz kimi qiymətləndirilib.