Minifutbol üzrə dünya çempionatı ərəfəsində komandaların üzvləri turnirlə bağlı fikirlərini bölüşüb

21 may tarixindən Azərbaycanın paytaxtı Bakıda keçirilən minifutbol üzrə dünya çempionatı ərəfəsində turnirdə iştirak edən komandaların üzvləri mötəbər yarışla bağlı fikirlərini bölüşüblər.

Təşəbbüsü yüksək dəyərləndirən əcnəbi idmançılar və milli komandaların heyət üzvləri təşkilatçılığın yüksək səviyyədə olduğunu vurğulayıblar.

“Yüksəksəviyyəli təhlükəsizlik – bu, çox vacibdir. Bakıda isə təhlükəsizlik ən yaxşı səviyyədədir. Burada ilk dəfədir oluram. Kimsə Bakı haqqında soruşsa, mən yalnız müsbət fikirlərimi bölüşəcəyəm”, − bosniyalı futbolçu Haris Medunyanin belə söyləyib.

Serbiyalı futbolçu Çedomir Tomçiç isə qeyd edib ki, Azərbaycana gəlmələri onların həyatında ən pozitiv xatirələrdən biri kimi qalacaq.

“Bakıda baş verənlər sadəcə olaraq möhtəşəmdir. İnsanlar çox mehribandır”, − deyə serbiyalı futbolçu Çedomir Tomçiç əlavə edib.