“Neftçi” avrokuboklarda mübarizəni dayandırıb

“Neftçi” UEFA Konfrans liqasının III təsnifat mərhələsində cavab matçına çıxıb. Bakı təmsilçisi Türkiyədə “Beşiktaş” kollektivinin qonağı olub.

“Vodafon Park” arenada keçirilən oyunda hesabı komandamız açıb. 36-cı dəqiqədə Emin Mahmudov “flaqman”ı irəli çıxarıb.

İlk hissə təmsilçimizin minimal üstünlüyü ilə yekunlaşıb. Lakin 2-ci yarıda “Beşiktaş” dönüş etməyi bacarıb. Bakıdakı matçda da fərqlənən Vensan Abubakar 57-ci dəqiqədə tarazlığı bərpa edib. Çox keçmədən Cekson Muleka İstanbul təmsilçisini irəli keçirib. Qalan vaxda da təşəbbüsü əldən verməyən “Beşiktaş” görüşdə 2-1 hesabı ilə qalib olub.

Bu komandalar arasında ilk oyun İstanbul təmsilçisinin 3-1 hesablı qələbəsi ilə başa çatdığı üçün iki oyunun “qara-qartallar” yekununda pley-off mərhələsinə yüksəlib. Burada İstanbul nəhənginin rəqibi Ukraynanın “Dinamo” Kiyev klubu olacaq.