“Neftçi”nin kapitanı Emin Mahmudov azarkeşlərdən üzr istəyib

“Neftçi” klubunun kapitanı Emin Mahmudov azarkeşlərdən üzr istəyib.

32 yaşlı yarımmüdafiəçi bu barədə şəxsi “Instagram” hesabında paylaşım edib.

Təcrübəli futbolçu cari mövsüm uğursuz çıxış etdikləri üçün çox utandığını və fanatların bu nəticələrə layiq olmadığını yazıb.

“Neçə gündür ki, sizə yazmaq istəyirəm. Ancaq indi özümdə güc və inam tapıb sizə səslənirəm. Bilirəm ki, bu dəqiqə çox üzgünsünüz. Gözləntilərinizi qarşılaya bilmədik. Siz azarkeşlərin istədiklərini verə bilmədik. Bilməyinizi istəyirəm ki, tək son oyuna görə yox, ümumi mövsümə görə çox utanıram. Sizlər bu nəticəyə layiq deyilsiniz. “Neftçi” ailəsinin kapitanı olaraq sizə bunları yaşatdığımıza görə üzr istəyirəm!”, – deyə o bildirib.

Qeyd edək ki, “Neftçi” klubu çempionatında son turunda “Sabah” kollektivinə 1-0 hesabı ilə məğlub olaraq turnir cədvəlinin 5-ci pilləsinə enib və Avrokuboklardan kənarda qalıb. Eyni zamanda “ağ-qaralar” ölkə kubokunun yarımfinalında “Qarabağ”a məğlub olaraq burada da mübarizəni dayandırıblar.