Nəriman Axundzadə “Qarabağ”dan ayrılır?

“Qarabağ”ın gənc ulduzu Nəriman Axundzadə karyerasını Birləşmiş Ərəb Əmirliklərində davam etdirə bilər.

20 yaşlı hücumçu əvvəlki illərin məşhur futbolçularından Ernan Kresponun baş məşqçisi olduğu “Əl-Əin”in transfer hədəfidir.

Yerli mediada yayılan xəbərə görə, bu klub hələ ötən mövsüm “Braqa” ilə Avropa Liqası matçlarından sonra N.Axundzadənin çıxışını diqqətlə izləyir.

Bildirilib ki, “Əl-Əin” keçidi reallaşdırmaq üçün bu mövsümün sonunda “köhlən atlar”a rəsmi təklif göndərəcək.

Qeyd edək ki, müqaviləsi 2028-ci ilədək olan Nəriman 2023-cü ildən “Qarabağ”ın əsas heyətində çıxış edir. Bu müddət ərzində 68 oyunda iştirak edən forvard 18 qol və 7 məhsuldar ötürmə müəllifi olub.

Ağdam təmsilçisi ilə Azərbaycan çempionatı və Kubokunu qazanan istedadlı futbolçu həm də 21 yaşadək yığmamızın üzvüdür. Bu komandamızda 9 matçda 1 qol vuran N.Axundzadə əsas millidə 1 qarşılaşmada meydana çıxıb.