“Qarabağ” Azərbaycan çempionatında inamlı qələbə qazandı

Avropa liqasının matçında HİK-ə 2-1 hesabı ilə qalib gələn “Qarabağ” Azərbaycan çempionatının 2-ci turunda “Turan Tovuz”u qəbul edib.

“Köhlən atlar”ın üstünlüyü ilə keçən görüşdə ilk qol yarım saatın tamamında vurulub. Ağdam təmsilçisinin yeni transferi Juninyo fərqlənib: 1-0.

İlk hissə bu hesabla yekunlaşıb. Fasilədən sonra da təzyiqi davam etdirən “Qarabağ” 66-cı dəqiqədə 2-ci qolu vurub. Bu dəfə Abdulla Zubir hədəfi dəqiq nişan alıb. Çox keçmədən Adama Diakabi qonaqları 3-cü dəfə matça mərkəzdən başlamağa məcbur edib. Qalan vaxtda da təşəbbüsü əldən verməyən “köhlən atlar” 3-0 hesablı qələbə qazanıblar.

Qeyd edək ki, baş məşqçi Qurban Qurbanovun futbolçuları avqustun 17-si Avropa liqasında növbəti oyuna çıxacaqlar. Azərbaycan çempionu III təsnifat mərhələsinin cavab görüşündə Finlandiyanın HİK kollektivinin qonağı olacaq.