“Qarabağ”ın futbolçuları Almaniya klubunun transfer hədəfində

11 mart 2024 318 baxış

“Qarabağ”ın monteneqrolu üzvü Marko Yankoviç “Auqsburq” klubunun transfer hədəfinə çevrilib.

Yayılan məlumata əsasən, Almaniya təmsilçisinin rəhbərliyi Avropa Liqasında “Qarabağ” və “Bayer” arasında matçda Markonu izləyərək onun çıxışını bəyənib.

Son xəbərlərə görə, “Auqsburq” M.Yankoviçlə yanaşı, “köhlən atlar”ın daha bir lideri Abdullah Zubirlə də maraqlanır. Bildirilib ki, Almaniya klubunun rəsmiləri martın 14-ü keçiriləcək "Bayer" – "Qarabağ" görüşündə A.Zubiri də yaxından izləyəcəklər.

Qeyd edək ki, 28 yaşlı Marko Yankoviç 2022-ci ildən “Qarabağ”da çıxış edir. 81 oyunda 6 qol vuran futbolçu ötən mövsüm Azərbaycan çempionatında qalib gəlib. 2018-ci ildən ağdamlıların şərəfini qoruyan A.Zubir isə 250 qarşılaşmada 57 topun müəllifidir. “Qarabağ”la 4 dəfə ölkə çempionu olan 32 yaşlı yarımmüdafiəçi 1 dəfə ölkə Kubokunda qələbə qazanıb.

#Qarabağ FK